Arsenal နောက်ခံလူ William Saliba ဟာ ကာလရှည် ခါးဒဏ်ရာကနေ ပြန်လည်သက်သာလာမှုမှာ အရေးပါတဲ့ တိုးတက်မှုရရှိခဲ့ပြီး ပြီးခဲ့တဲ့နွေရာသီနောက်ပိုင်း ပထမဆုံးအကြိမ် မြက်ခင်းပေါ်မှာ ပြန်လည်လေ့ကျင့်နိုင်ခဲ့ပြီလို့ သတင်းထွက်လာပါတယ်။
အသက် ၂၅ နှစ်အရွယ် ပြင်သစ်နောက်ခံလူဟာ World Cup ဆီမီးဖိုင်နယ်မှာ စပိန်ကို ရှုံးနိမ့်ခဲ့တဲ့ပွဲအတွင်း ဒဏ်ရာပိုမိုဆိုးရွားလာခဲ့ပြီး ဇူလိုင်လကတည်းက ကာလရှည်အနားယူနေရတာပါ။
Saliba ဟာ ခွဲစိတ်ကုသမှု မခံယူဘဲ Arsenal မှာ နေ့စဉ် Physiotherapy နဲ့ Massage ကုသမှုတွေ ပြုလုပ်ခဲ့ပါတယ်။ အသင်းဆေးအဖွဲ့ကလည်း အလျင်စလို ပြန်ကစားခိုင်းခြင်းမရှိဘဲ စက်ဘီးလေ့ကျင့်မှုကနေ အခု Running Training အဆင့်အထိ တဖြည်းဖြည်း တိုးမြှင့်ပေးထားပါတယ်။
L’Equipe ရဲ့ ဖော်ပြချက်အရ Saliba ဟာ ပြီးခဲ့တဲ့ရာသီနှောင်းပိုင်းနဲ့ World Cup ကာလအတွင်း နာကျင်မှုသက်သာဆေးတွေကို အားကိုးပြီး ကစားခဲ့ရပြီး ပွဲတစ်ပွဲကစားပြီးတိုင်း နှစ်ရက်ခန့်အထိ လွတ်လွတ်လပ်လပ် လှုပ်ရှားဖို့ ခက်ခဲတဲ့အခြေအနေတွေ ရှိခဲ့ပါတယ်။
Saliba နဲ့ နီးစပ်သူတွေကတော့ “သူ အရမ်းနာကျင်ခံစားခဲ့ရပြီးပါပြီ။ ဒါကြောင့် အချိန်ယူရမယ်ဆိုတာ သူသိပါတယ်။ ၁၀၀ ရာခိုင်နှုန်း ကြံ့ခိုင်မှသာ ပြန်လာချင်တာပါ” လို့ ပြောပါတယ်။
Saliba မပါဝင်နိုင်တဲ့ကာလမှာ နွေရာသီခေါ်ယူထားတဲ့ Ezri Konsa က Gabriel Magalhaes နဲ့အတူ Arsenal ခံစစ်ဗဟိုမှာ တာဝန်ယူကစားနေပါတယ်။
Saliba ဟာ 2019 ခုနှစ်က Arsenal ကို ရောက်ရှိလာပြီးနောက် ပြိုင်ပွဲစုံ ၁၈၄ ပွဲ ကစားထားပြီး PFA Team of the Year မှာ လေးရာသီဆက် ရွေးချယ်ခံထားရသူလည်း ဖြစ်ပါတယ်။
လက်ရှိ မြက်ခင်းပေါ် ပြန်လည်လေ့ကျင့်နိုင်ပြီဖြစ်ပေမယ့် Arsenal ဘက်က သူ့ကို အလျင်စလို ပွဲထွက်ခိုင်းဖို့ထက် ကြံ့ခိုင်မှုအပြည့်အဝ ပြန်ရလာမှသာ အသင်းထဲ ပြန်လည်ထည့်သွင်းသွားမယ့် သဘောထားရှိနေပါတယ်။
